有日診所唔係太多人…
『叮』,『叮』,『叮』。候診大堂出面傳嚟幾聲電話響,應該係Whatspp聲嚟~
再之後繼續『叮』,『叮』,『叮』。
有把男聲就大聲喝:「叮夠未呀?你電話係咁響,我以為係我呀!你個電話聲同我一樣呀!」

珍寶豬|寶豬診所|診所有毒

先生嫌女士個電話鈴聲嘈

我抬頭望望,先生原來喺度炳緊嘅係一位女士。
女:「我有message關你事嘅?我自己有message咋喎」
男:「你個鈴聲同我嘅一樣呀,搞到以為係自己電話響呀!」
咁都好嘈?人生係咪太悶呀?

女:「我電話響關你咩事呀?我自己覆緊message又關你咩事呀?」
男:「你轉聲,你唔好同我一樣聲呀!」
點解唔自己轉呀?又或者自己較做靜音震機咪得囉?震機應該淨係震到你啦卦?

先生要求女士轉鈴聲

女嘅唔出聲~
男嘅見咁樣都好冇癮唔出聲。

過咗陣,『叮』!
男嘅激到彈起身向住女大嗌:「響呀!」
女望望自己電話:「我mute咗啦!」
男:「係邊個電話響呀?」
男望望我登記處方向,嗱,唔係我呀~我返工電話一定要較靜音呀~

先生:邊個電話同我一樣聲呀?

『叮』!
男又受到叮聲挑釁:「又響呀!邊個電話同我一樣聲呀?」
佢行埋嚟我面前問我:「係咪你部電話呀?」
我:「我返工靜音…」
佢:「入面呢?」
我:「我哋全部人都係…」

「係鬼搵我呀!」

 『叮』!
咦,我聽到個叮聲好似係喺我面前…
我:「先生,會唔會係你自己部電話響呀?」
佢邊拎起電話邊講:「係鬼搵我呀!」

佢望望電話靜了,轉身行埋去坐低。
睇嚟真係有鬼搵你喎~

按此訂閱《香港財經時報》HKBT 新聞快訊

編按:專欄作者珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。

作者簡介:珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。

免責聲明:本網頁所有專欄作者的觀點,不代表本媒體立場。