有日診所門一直被敲。
我望見門外企咗個人喺度，於是行出去拉開隻門問：「係咪睇醫生呀？我哋開咗門啦喎」
對方係一位男士，佢電光火石之間立即退後加單手掩住口罩：「你唔好開門呀！」
先生：診所有毒呀！
我：「咁你唔好再敲我哋隻門啦喎」於是我閂門行返去自己位。
佢繼續企喺出面，隔住隻門嗌：「我要睇醫生呀」
我停低腳步，又隔住隻門嗌：「你要睇醫生就入嚟啦」
佢：「診所有毒呀！呢度有太陽殺菌呀」
咁你去公園擁抱大樹光合作用吓就咩病都冇啦～呢個世界真係美麗，啲空氣真係清新，去啦，正午時間啲太陽最勁呀。
「啲毒湧出嚟㗎」
我又拉開診所門：「你要睇醫生就要入嚟」
佢大嗌：「唔好開門呀！啲毒湧出嚟㗎」
你又講得幾生動喎～似乎你好似需要轉介信啊。
我唯有閂返隻門，真係行返去自己位。
佢仍然隔住門嗌：「我想睇醫生呀」
我哋再冇人理佢。
阿姨：你當醫生姑娘傻嘅咩？
隔咗陣，一位阿姨推門入嚟診所。
男士喺門外嗌住阿姨：「入面好多毒㗎！」
阿姨：「有毒嘅都係班醫生姑娘死先啦，佢哋都冇死證明安全啦，我睇咁多單新聞話啲人中肺炎，都未聽過話有好多診所醫生姑娘中肺炎啦。分分鐘入面仲安全過出面呀！你當醫生姑娘傻嘅咩？」
終於！男士跟埋阿姨一齊入嚟診所。
多謝你呀阿姨！
編按：專欄作者珍寶豬任職診所助護多年，工作時遇見不少診所內的千奇百趣人生百態，別人看在眼內或會認為是份苦差，但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時，請勿對號入座。
作者簡介：珍寶豬任職診所助護多年，工作時遇見不少診所內的千奇百趣人生百態，別人看在眼內或會認為是份苦差，但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時，請勿對號入座。
免責聲明：本網頁所有專欄作者的觀點，不代表本媒體立場。
