電話響起~
我:「你好,乜乜乜診所」
對方係一位先生:「喂?你哋嘅CCTV係幾號台?」
先生打嚟問CCTV幾號台
我:「CCTV?你係咪打錯電話呀?」
佢:「診所呀嘛,乜乜乜醫生呀?」
我:「係嘅,你係…整閉路電視師傅?」
佢:「我想嚟睇醫生㗎喎」
我:「八點前嚟到登記就可以啦」
佢:「CCTV呢?幾號台呀?」
我:「我哋個閉路淨係得醫生可以睇㗎咋」
屋企部升降機我都睇得啦
佢:「屋企部升降機我都睇得啦」
你屋企又唔係診所,診所又唔係你屋企。
我:「我哋診所嘅唔會俾其他人睇嘅」
佢:「咁我點知有幾多人喺度呀?」
我:「而家得三個人喺度咋,你要睇醫生嘅可以過嚟呀」
佢:「咁唔係成日都係得三個人喺度㗎嘛!會變㗎嘛!」
我:「有需要你都可以再打嚟問我」
佢:「下下都要打嚟問你,好得閒咩」
都應該幾得閒呀你,睇升降機都唔夠,仲要睇埋診所,應該忙極有譜。
病唔病㗎?真病定假嗰隻呀?
我:「你想知有幾多人喺診所就再打嚟問我啦」
佢:「嘖,咁個三個點㗎?病唔病㗎?真病定假嗰隻呀?有冇咳㗎?」
我:「唔好意思先生,其他病人嘅嘢我唔會答你」
佢:「嘖!咪係囉!俾我睇住個CCTV咪知佢哋真病定假病囉!我睇都唔睇吓有冇病就嚟你度,有事嗰個咪係我?」
在座各位病人,我幫你哋搵到位神醫,有冇興趣轉會呀?
唔俾人睇CCTV係自私!
我:「但係閉路真係唔可以俾人睇…」
佢:「自私囉!」
嘟。我又俾人cut線…
其實你都可以隔住玻璃睇嘅…
編按:專欄作者珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。
作者簡介:珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。
免責聲明:本網頁所有專欄作者的觀點,不代表本媒體立場。