有日一位女士嚟到睇醫生。
拎藥準備俾錢時,佢問我:「我同你換得唔得呀?」

【珍寶豬|寶豬診所】好勁抽

超市現金券換現金

我:「嗯?」
佢拎出幾張超市現金劵。
我:「我哋淨係收現金」
佢:「你同我換現金呀」
換你個頭。

病人堅持現金券都係現金

我:「我哋唔收現金劵,亦都唔需要現金劵呀」
佢:「都係現金嚟啫」
好呀,你去銀行叫職員幫你入落銀行戶口呀。

我:「我哋唔收現金劵」
佢拎起現金劵:「期都未過點解唔收呀?」

唔收現金券 唔夠國際化

我:「我哋一向都係收現金嘅,其他一律唔收」
佢喺個袋度邊摷銀包邊講:「咁多限制㗎,都唔國際化嘅」
國際?你拎住你啲現金劵去日本當錢駛先呀?我冇出聲冇理佢,純粹等緊佢俾錢。

佢動作停了,再問我:「呢間嘅雪糕劵呢?」
冇錢俾我就撕爛你張病假紙㗎啦~

「咁樣蝦我一個女人仔」

我:「淨係收港幣現金,如果你冇現金嘅,我幫你HOLD起袋藥同病假紙先呀,你轉頭拎完錢再返嚟攞呀。但係一定要今日應診時間內過嚟喎,如果唔係病假紙我哋就會即日取消㗎啦,你之後攞唔返張病假」
佢企咗喺度望住我。

我見佢都望咗一陣,我問佢:「小姐?你係咪出去拎錢呀?」
佢又回復摷袋嘅動作,拎錢找數:「咁樣蝦我一個女人仔」
我都廢事啋佢…竟然大隻過我仲敢自稱『女人仔』,嚇鬼死人咩?

按此訂閱《香港財經時報》HKBT 新聞快訊

編按:珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。