有日一位小姐嚟到診所。
佢拎出醫療卡:「我喺度睇過㗎啦」
我望望醫療卡,見到個有效期:「小姐,你呢張係咪過咗期啦?卡公司有冇俾過張新嘅你呀?」
佢:「冇呀,佢哋話可以用得㗎」
我:「哦?係呀?」
於是我拎起電話,佢一見到我拎起電話就喝住我:「你做咩呀?」

【珍寶豬|寶豬診所】以為女士想驗孕!姑娘要求留小便不果!原因是...

醫療卡要拎CODE

我:「打電話去卡公司?拎CODE囉?」
佢:「拎咩CODE呀?」
我:「你張卡我要打上去拎咗個CODE先㗎,有CODE先可以簽名睇醫生…」
佢:「我拒絕呀!」
我:「即係你唔睇呀?」
佢:「我拒絕你打電話呀!你俾我睇完先可以打!」

【珍寶豬|寶豬診所】驗孕

睇醫生用醫療卡

我:「我哋唔得㗎,一定要拎咗CODE先㗎」
佢:「我拒絕呀!你喺我面前打就即係唔尊重我!你等我走咗先打囉!」
我:「小姐我哋要喺你入醫生房前準備好晒啲嘢,先會俾你入房睇醫生㗎,我拎完CODE之後仲要填單俾你簽名,出藥又要醫生簽㗎~所以冇得等你走咗之後先做呢啲程序嘢呀,你要睇醫生用醫療卡嘅,我就要打電話上去」
佢:「我簽幾多個名俾你都得,你要我簽名呀嘛?我簽呀!」
你以為你係明星咩~就算你係明星,我都已經過咗追星階段啦,我唔會無啦啦問明星拎簽名㗎啦。

白撞嘅應該唔算客

我:「唔係純粹簽名問題,係我都要同卡公司嗰邊對咗你張卡啲資料先,佢哋先開到單俾到CODE我,你張卡係咪過咗期唔用得,所以你先唔俾我打上去呀?」
佢一手搶返張醫療卡:「你過期我都未過期呀!你咁樣對客唔駛旨意我會幫襯你呀!」
講完之後佢就即刻轉身離開診所,白撞嘅應該唔算客啦。

按此訂閱《香港財經時報》HKBT 新聞快訊

更多文章:【珍寶豬|寶豬診所】好勁抽

【寶豬診所】有位先生睇完醫生,望見病假紙上寫嘅係上呼吸道感染,死纏爛打要求喺病假紙上寫啲特別嘅嘢,仲要聽落係好勁抽嘅。

有日一位先生睇完醫生~
佢拎藥時,我同佢講:「啲藥有冇嘢唔清楚嘅要問我?」
佢望望堆藥:「應該冇啦,都係咁食嘅啫...」

嫌「上呼吸道感染」唔夠勁

我:「嗯,咁你對對病假紙上面嘅名同日期啱唔啱呀~」
佢望望:「呢個U字頭嘅係咪即係傷風呀?」
我:「上呼吸道感染」
佢擰擰頭:「聽落好似唔夠勁」
我:「你係傷風啫,你頭先都係同醫生講少少流鼻水之類呀嘛?」
佢:「係~我同醫生梗係咁講啦,我知勁嘢佢都醫唔到呀嘛,屋邨仔醫生鬼有醫術咩」

我都唔知你咁算唔算係明白事理嘅人啦~

病人:可唔可以寫咗勁抽啲嘅嘢上去?

我:「病假紙冇問題嘅話,我同你袋起佢呀,呢度三百蚊呀」
佢:「阿姑娘呀,你可唔可以寫咗勁抽啲嘅嘢上去呀?」
我:「咩嘢勁抽啲呀?」
佢:「個名勁抽啲嘅,一聽落去就係好勁抽嗰隻!」

你點解唔改名呀?身分證去改名叫做『好勁抽』咪得囉,同人介紹自己嗰時仲可以講『小姓好,名叫勁抽』,好勁抽呀!

病人:可能我流腦水呢

我:「醫生係根據返實際情況嚟寫嘅,唔會亂咁寫㗎,你係傷風就傷風㗎啦」
佢:「其實都係我話咩就咩㗎啦,都唔係醫生發現我係傷風㗎啦,係我入到去同佢講咩就咩咋嘛」
我:「咁醫生都係根據你所講嘅病徵而診斷嘅~你頭先唔係同醫生講你有少少流鼻水咩?」
佢:「我話有鼻水啫,唔一定係鼻水嚟㗎嘛,佢睇吓就知係咪鼻水嚟咩,咪即係我話係咩就係咩囉,真實嘅話可能我流腦水呢。佢可唔可以寫個勁抽啲嘅嘢呀?」

你個腦就真係入水啦。

我:「一係我俾你入返去見醫生呀,等醫生同你抽血做個全身檢查睇吓有冇咩問題呀~好冇呀?」
佢:「全身檢查?」
我:「係呀,抽血照肺嘅,逐樣驗吓,至少你預返幾千蚊~」
佢耍手擰頭:「哇唔駛唔駛呀,我濕濕碎嘢都咁大陣仗?唔駛唔駛,三百呀?我走得啦?」
你唔係要好勁抽咩?做咩走得咁快呀?

編按:珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。 

【珍寶豬|寶豬診所】瞓覺啦 

編按:珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。