有日一位先生睇完醫生~
我出藥俾佢時:「呢啲每日四次,每次一粒,而呢包就早晚一次,每次一粒」
我指住其中一包藥:「呢個食咗就會眼瞓嘅,食咗藥就唔好揸車」

佢:「我都冇車嘅」
我:「咁就得啦,食完藥多啲休息,呢度有病假紙,你望一望睇吓啱唔啱」
佢認真望完:「啱呀」
我收起啲藥同病假紙,準備袋起。

先生關心食藥後的眼瞓程度

佢:「等等呀姑娘,仲有嘢想問」
我:「仲有咩要問?」
佢:「隻藥食完真係會眼瞓㗎?」
我:「係呀」
佢唔出聲。

【珍寶豬|寶豬診所】以為女士想驗孕!姑娘要求留小便不果!原因是...

一直眼瞓到食下一次藥

我:「你想要唔眼瞓嘅藥?我幫你問醫生轉唔轉到?」
佢:「唔駛唔駛,佢嘅眼瞓程度十分有幾多分呀?」
我:「ER…應該四五六左右啦?」
佢:「即係都幾眼瞓啦,一食完就要瞓幾多個鐘?」
我:「ER…藥力都應該維持到三至四個鐘嘅」
佢:「即係我每四個鐘食一次,就一直眼瞓到食下一次藥係咪?」
我:「都可以咁講…」

【珍寶豬|寶豬診所】病人嫌病假紙寫「上呼吸道感染」唔夠勁抽!要求姑娘咁做

剩咗嗰八個鐘點算呀?

佢喺度計數:「每日四次,每次四個鐘,即係我一日有十六個鐘都係瞓住過,咁我剩咗嗰八個鐘點算呀?一日廿四個鐘㗎嘛」
我:「瞓到可以瞓埋佢嘅…」
佢又喺度計數:「一日有成十六個鐘都喺度瞓」
我:「你係咪唔想啲藥咁眼瞓呀?」
佢:「唔係呀,我覺得好幸福呀,可以瞓到咁耐好幸福呀」
佢露出燦爛笑容…

我:「…仲有冇其他問題…」
佢心滿意足:「冇啦,我而家就返去瞓啦」
睇嚟佢真係好需要休息。

按此訂閱《香港財經時報》HKBT 新聞快訊

編按:珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。

作者簡介:珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。

免責聲明:本網頁所有專欄作者的觀點,不代表本媒體立場。