電話響起~

我:「你好,乜乜診所」
對方係一位女士:「喂?診所?驗孕棒一條線係咪真係冇BB㗎?」
我:「應該會有說明書俾你睇返,正常嚟講一條線係冇嘅」
佢:「吓?真係冇㗎?」

我冇出聲。

【珍寶豬|寶豬診所】病人嫌病假紙寫「上呼吸道感染」唔夠勁抽!要求姑娘咁做

女士再來電詢問驗孕詳情

佢再講:「你哋診所係咪有得驗㗎?」
我:「係呀,我哋今晚收八點,最遲七點九嚟到診所登記。」
佢:「咁我今晚夜啲再打俾你呀」

佢收咗我線。
我繼續做呀做呀做呀俾客炳呀俾客玩呀,咁又差唔多收工。

按此訂閱《香港財經時報》HKBT 新聞快訊

姑娘要求留小便

電話再響起,又係佢:「喂?係咪有驗孕呀?」
我:「我哋就收工啦,你係要驗嘅要快啲嚟啦,仲有十分鐘就截症,再唔係聽日先嚟啦」
佢:「你pack定俾我呀,我好快嚟到呀,我就住附近咋,十分鐘左右到㗎啦,一係你就咁掛喺診所門口?」
我:「都要登記先會俾樽你留小便㗎,太趕嘅話就聽日先嚟啦」
佢:「樽?你唔係直接俾驗孕棒我咩?」
我:「我哋嗰啲唔係就咁俾你揸住驗㗎,係要你留小便再俾我哋驗嘅」
佢:「我唔係要驗喎,我係要你哋驗完嗰啲喎」
我:「…你意思係屬於其他人嘅驗孕結果?」
佢:「係呀,我要攞去同男朋友講我有咗㗎,我晏晝打嚟,個姑娘話俾我嘅?」

你以為診所真係有好多姑娘聽電話嗎?由始至終都係得我一個咋。

已同男朋友講今晚有surprise

我:「我…冇咁講過喎,我意思係叫你嚟登記驗孕咋喎。」
佢:「我等咗成日你而家先同我咁講?喂,我仲同咗我男朋友講今晚有surprise㗎」

我唔敢出聲…

佢再講:「喂?我唔話有咗佢點會娶我呀?」
我唯有出絕招啦:「…但係今日都冇人嚟驗過孕」
佢:「你而家先講?你唔識一開始聽我電話就講㗎咩?」

嘟。佢又收咗我線。

編按:珍寶豬任職診所助護多年,工作時遇見不少診所內的千奇百趣人生百態,別人看在眼內或會認為是份苦差,但轉換角度看每個見聞每個經歷亦可能是一個生活中的小警惕小樂趣。至今已出版《診所低能奇觀》1-6集。閱讀小故事時,請勿對號入座。